當年今日
關於我們

譚玉梅搽國產面霜中毒變豬頭

蘋果日報 2002/03/10 00:00


內地超標水銀面霜肆虐,趙世光紅顏知己譚玉梅(Mary)亦成為受害者。前晚Mary出席保良局餐舞會時,透露上星期試用內地漂白面霜,引致中水銀毒,面痕紅腫。
趙世光紅顏知己譚玉梅(Mary)前晚與胞妹譚紅梅,出席灣仔舉行的保良局周年慈善餐舞會,譚玉梅穿着黑色法國晚裝,大露背低開至腰間以下,問她可有穿着內褲?Mary以笑帶過說:「總之我有做安全措施,唔走光就得啦!」

又痕又乾
譚玉梅面部略見浮腫,原來是內地面霜所害,她說:「真係慘!我有個內地朋友見我皮膚黑,話介紹啲『筍嘢』畀我,係內地漂白霜,點知我搽咗兩日,塊面即刻又痕又乾、起粒粒,重腫到成面紅晒。醫生話我中水銀毒,好彩係輕微啫,唔係後果嚴重!搞到我幾日都唔敢見人,夜晚冇太陽我先敢去街咋!而家日日都要搽藥膏,食消炎藥,重要戒口㖭!真係慘!」
據譚玉梅所講,該樽由友人所贈的面霜,名為「超天真白霜」的漂白去斑面霜,乃上海出產,包裝精美,原價數百人民幣。成分包括珍珠、花粉等高級用料,在內地亦屬高級護膚品。

勸人切勿貪平
譚玉梅公開呼籲市民,勿輕信內地護膚品,她說:「真係好慘!我朋友都係好心做壞事,我唔會怪佢,亦唔會告嗰間公司!不過,我想大家以後要小心啲,唔好貪平,內地化妝品、護膚品,冇乜監管。女人塊面一世都要見人,搞壞咗好嚴重。」而對霍達被停牌至季尾,譚玉梅指沒與對方聯絡,但會精神上支持他。
採訪:林妙萍 攝影:羅德光