日前有財經網站大大隻字話佐丹奴主席劉國權，喺接獲日本便服王UNIQLO洽購後入市增持，講到好似有啲嘢咁。佐丹奴噚日即刻澄清，話劉生開始增持佐丹奴股份之時，兩間公司嘅管理層並沒有任何接觸，仲話劉生會就此保留考慮追討賠償之法律行動權利喎。
佐丹奴仲話，UNIQLO母公司FastRetailing（FR）日前指同佐記喺6月6日「首次接觸」，查實FR只係就安排會面向劉生嘅秘書查詢，內容亦只提及會涉及一般業務討論。佐丹奴認為那並不構成FR所講嘅「首次接觸」喎！
佐丹奴話，以佢哋嘅尺度，FR喺7月25日嘅會面中，首次表示有意買佢哋先至當真。自從FR話終止收購佐丹奴，股價又碌咗落嚟，其實件事經已告吹，邊次係第一次都唔重要啦！除非監管當局做嘢就另計，唔通……