過往股神fans如果想同畢菲特食晏，動輒要捐款過百萬港紙，但如今同佢食餐晚飯，居然4萬蚊有找！此話當真？食呢餐飯要成4萬蚊係真嘅，但到時係咪真係會見到股神，就可能要賭一賭運氣嘞﹗
事緣網站Charityfolks.com最近舉行咗一項慈善拍賣，勝出者可以與股神畢菲特、荷李活巨星羅拔烈福和著名鄉謠歌手TimMcGraw共晉晚餐。呢項拍賣喺香港時間昨晨7點鐘截標，結果由一名自稱「jaragon」嘅網友以底價5000美元（約3.9萬港元）勝出，獲得兩張邀請卡。
據Charityfolks.com行政總裁惠特科講，呢個私人派對會有50人參加，今個禮拜六喺畢菲特個女屋企舉行，而拍賣所得嘅收益會捐畀JamesRedfordInstituteforTransplantAwareness，呢間慈善機構主力宣揚器官捐贈。

去年午餐值484萬港銀

呢次晚宴原本以股神都會出席做號召，但網站其後又喺活動內容中刪除晒畢菲特家人嘅名。咁股神屆時到底會唔會現身呢？搞手不置可否，喺電話訪問中，佢話呢個係私人宴會，最重要係確保賓客嘅安全。而股神投資旗艦巴郡嘅發言人就以呢個晚宴唔係佢哋公司活動為由，拒絕評論。
舊年喺eBay拍賣「與畢菲特有個午餐約會」，就籌得破紀錄62萬美金（約484萬港元），而今次食晚餐就只籌得5000蚊，「身價」差天共地。身價大跌，畢菲特係咪因為咁而甩底，定係基於人身安全，所以故弄玄虛呢？謎底當晚自有分曉。
[email protected]