日本實力派女歌手AI首度來港，今日出席假中環蘭桂坊舉行嘅「日本秋祭」記者會，並宣佈將於11月25日假九展Music Zone開香港演唱會。

生於美國嘅AI入行17年，於日本歌壇早已站穩陣腳，又參與過《紅白歌唱大賽》，今次佢獲邀來港出席下月起展開嘅「日本秋祭」記招，專程到港推廣日本文化，同場仲有日本駐香港總領事館松田邦紀大使及蘭桂坊集團主席盛智文齊齊主持扑酒桶儀式。AI表現友善亦毫無架子，佢大方透露丈夫及囡囡都有一同來港，今次到埗即有機會大快朵頤，噚晚去咗食海鮮、又有去旺角女人街，今日就去咗飲茶，佢話蝦餃、蘿蔔糕、蛋撻都好好味，而香港都好多高樓大廈，今日搭車發現好多賣衫同賣玩具嘅舖頭，自言好想去shopping，可惜聽日要返回日本，笑言想在香港多留一星期。

講到圈中好友安室奈美惠宣佈明年9月引退，AI坦言知道時都好震驚，但亦係好有佢嘅作風，指安室作為女性、母親都好剛強，自言多得安室提攜才有今時今日嘅AI，亦好尊敬對方。