邊個會諗到，一個反白眼，會令呢排喺北京舉行緊嘅沉悶政治騷，突然大放令人意想不到嘅彩蛋：上海第一財經女記者梁相宜，「藐爆」女行家似發表個人見解多過似提問嘅畫面在網上瘋傳。喺高度政治化嘅中國社會，事件迅速升溫，網民犬儒式（Cynical）嘅冷嘲熱諷，竟令梁相宜這位藉藉無名嘅女記者風頭，完全蓋過中共苦心經營嘅全國兩會關注度。最過癮嘅喺，所有嘅政治監控，竟然因梁相宜喺直播鏡頭前嘅真情流露功力盡廢，搞到「莊嚴神聖」、關乎國家大政嘅兩會會議，成為國際笑話，外國媒體仲話呢個「史詩級」嘅反白眼動作，戳破咗全國人大作為橡皮圖章嘅「虛偽」。

點解一個真情流露嘅神態，會引起如此大風波，仲令到中共宣傳機器「大動干戈」，事後要對梁相宜作出如同將佢人間蒸發嘅全網封殺，同時又禁絕內媒炒作呢次事件呢？我哋不妨用德國社會學家貝克（Ulrich Beck）提出嘅「風險社會」（Risk Society）概念嚟分析。簡單嚟講，所謂「風險社會」所指嘅係現代社會其實充滿危機，所謂秩序、穩定實質好脆弱，所以政府會將各種風險「制度化」，如遊行示威先要申請；只不過「制度化」亦會帶嚟危機，有時候甚至比原本要避免出現嘅風險更難預計。

中共所做社會風險管控，可以話係舉世無雙，根本就係一種專制操控。事實上，去年10月，中共十九大政治報告，已經用「防範化解重大風險」來取代「維穩」。之不過，最強勁嘅政治審查、最嚴密嘅風險管控，都無法控制得到直播鏡頭前，人性嘅真情流露；即使有延後幾秒播出街嘅審查，再加兩個CAM畫面互相穿插嚴防穿崩，到你管得到啲人對眼，又點約束得到佢地個腦諗咩？

最過癮嘅係，內地網民竟然成功「騎劫」官媒嘅畫面。明明係由央視做直播，應該好穩陣，點知出咗街幾日，網民瘋傳有關片段，仲要快速起埋兩位女記者嘅底細。而啲喺網上做二五仔、金手指、審查網民言論嘅大媽、大叔，緊係覺得央視片無問題㗎啦，結果唔知識反應，到俾啲境外媒體發現，已經為時已晚。再加上中共一貫如同鐵板一塊嘅敏感反應，高調封殺再封殺。關乎國家面子嘅全國兩會會議，就係咁爆咗一場「關公災難」。

其實，兩會期間發生這種事情有甚麼大不了？相反，卻可能令鬼咁悶蛋嘅會議，有多啲人關注下，唔係更加好咩？就連《環球時報》老總胡錫進用「單仁平」個筆名，喺佢嘅「快閃」評論中都講：「老百姓就是喜歡這種東西，人性的這種DNA改不了」，根本就係無傷大雅。只可惜，中共就係缺乏咗呢啲幽默感，仲有就可能係習總要「永續稱帝」，當然不容風頭被搶去。但依家最難堪嘅係，呢單嘢俾外媒攞嚟嘲諷你連人民反白眼嘅權利都要剝奪，開大人、政協會議根本就好「虛偽」。仲要意外被人踢爆咗中共搵自己友記者扮外媒，企圖製造輿論嚟呃番啲內地人。呢塊遮醜布咁樣俾人揭開，中共唔嬲都幾難。

一個「藐爆」特權、虛偽同惺惺作態嘅反白眼小動作，竟然超出中共嘅風險管控，引起咗咁大迴響，其實真係幾荒謬。

花生蘋論員