究竟應該先講夏蕙姨BB先，定係講佢頭號fans沈旭暉先？咁其實，夏蕙姨BB先係主角，咁頭號黃粉沈大師唯有讓路——係咁嘅，有網民發現，每次有夏蕙姨BB出現，沈大師總係第一時間貼佢嘅post，同埋追蹤關於BB嘅最新發展——好似今次BB會以乜嘢look打扮去黃大仙呢？沈旭暉下午已經好肉緊咁喺facebook貼舊圖並寫道﹕「每年過年，都萬眾期待，相信蛇年也不會令人失望。」

好不容易，等到了，終於等到了……夏蕙姨BB個「靈蛇姥姥」look，千呼萬喚始出來——其實8點幾左右已經有人見到佢。沈大師當然拿拿聲轉貼，並充滿感情地寫道﹕ 「蛇年來了，等了一年，終於等到了﹗」 呢張相貼咗兩個鐘，有二千四百幾個likes﹗

有網民噚日已經揚言，要儲齊夏蕙姨BB十二生肖(即係指佢頭上飾物)閃卡，不過相比上年嘅小龍女、前年嘅跳跳虎，同之前嘅小豬嘜，或者米妮老鼠，呢條銀蛇+蠱惑的蛇，被評霸氣不足。但亦有網民留言謂﹕ 「郵政署有冇考慮幫夏姨姨出番套十二生肖小全章？」

唉，咁多位小儍豬，你們以為夏蕙姨BB不知道大家愛佢嗎？所以頭先佢都將呢張新閃卡擺咗上facebook，寫道﹕ 「大家最期待嘅畫面出現喇！」 太有愛了﹗

(p.s.﹕年年電視台攝影師都搵到夏蕙姨BB嚟影，今年，即使BB打扮平淡了，但仍然成功吸睛，仲影得好清晰﹗)