由韓國男星朴敘俊跟女星朴敏英合作嘅tvN新劇《金秘書為何那樣》現時喺韓國熱播，前晚播出嘅第三集收視更創新高。《金秘書》噚晚播出第四集，朴敘俊因為朴敏英與男同事親密玩二人三足而呷醋，問朴敏英係咪為咗贏亦唔介意有身體接觸，朴敏英死頂話無所謂，朴敘俊就霸氣捉住朴敏英隻手並攬住對方，兩人對望氣氛曖昧，直到冰袋跌咗落地下先令兩人急忙分開。

朴敏英重新返到客廳時，發現朴敘俊已經瞓着咗並發惡夢，朴敏英就叫醒對方。朴敘俊隨後問朴敏英要唔要喺佢屋企過夜，令朴敏英嚇咗一跳，朴敘俊先解釋：「因為已經好夜，所以留你一晚先走，以前你加班時都成日喺客房瞓喇，你期待乜嘢？」再次發揮佢自戀嘅一面，場面爆笑。不過朴敘俊嘅哥哥李泰煥就突然喺海外回國，並表示要去搵朴敘俊，所以朴敏英就走咗，最終冇喺男方屋企過夜。而朴敏英返屋企途中遇到李泰煥，李泰煥更踎低幫女方綁鞋帶，為兩人結緣。

為咗圖書館開幕禮，朴敘俊、朴敏英到現場視察，點知突然停電，朴敘俊就開住手電筒方便朴敏英睇書，隨後兩人離開時，朴敏英主動拖住朴敘俊隻手，帶對方離開，點知朴敘俊轉為主動反握住朴敏英，令兩人感情升溫。此外，李泰煥、朴敘俊兩兄弟再因小時候嘅事打交，朴敘俊嘴角受傷流血，去咗搵朴敏英求安慰，朴敏英為對方擦藥時，朴敘俊無意中拎起牛牛公仔，朴敏英為咗內衣不被發現就撲上去搶，卻意外撲到朴敘俊懷中，朴敘俊就緊緊攬住對方，並表白：「就咁樣一陣，我依家想愛你，試下去愛你。」

下集預告朴敘俊正式追求朴敏英，而《金秘書》噚晚一集有6.379%收視，比上集微跌。

更多韓流，喺晒《娛果》
http://fb.com/appledailyent