35歲嘅胡杏兒,尋尋覓覓,終於覓得有情人,同李詩韻舊愛、年輕才俊Phil拍拖三個月,亦有指Phil對杏兒一見鍾情,相識未幾已展開強烈攻勢,且去年底已火速求婚成功。其友人更謂,Phil向來鮮有帶女友見朋友,但自從認識杏兒後,已視成為人生另一半,兩口子去到邊都拖到實,似乎真係好事近。(新聞連結: http://bit.ly/1HgAy1s )
不過今日就有報道話,有「選美殺手」之稱嘅Phil,上周三趁杏兒喺內地開工嗰陣,偷會三女,喺中環街頭細聲講大聲笑,其中一個仲係莊思敏個妹莊思華。身為著名夜場Play股東之一,Phil夜晚現身中環social唔奇,但報道就話佢最後同一黑髮、外表pure嘅女子登車絕塵而去,去邊就唔知喇。
仍身在內地開工嘅杏兒,今早接受《蘋果》訪問時就表示:「佢(男友)唔係圈內人,都有自己嘅社交圈子,我100%信任佢,以後有時間都會同佢多啲出嚟,所以都會多啲見到我哋一齊,希望大家俾啲空間佢,俾啲空間我哋!」
其實杏兒噚日接受本報訪問,大方承認戀情時,都已經話:「男朋友好好,唔好嚇走佢呀。」所以呢,大家唔使咁敏感嘅!