北京同建制派一直抹黑反送中有外國勢力介入、係顏色革命，但今次成場運動一冇大台、二冇民主派做組織，全部係網民自發行動，北京、建制要好似之前佔中咁，夾硬搵人出嚟屈係外國勢力支持，其實唔易。但呢個時候，建制陣營突然瘋傳一條青年新政梁頌恆同郭文貴網上對話片，話係外國勢力介入「證據」，令人覺得件事唔簡單。

郭文貴講明送錢

呢條短片其實係剪自6月17日郭文貴主持直播節目，片入面郭形容梁頌恆係佢在港重要戰友之一，又叫梁盡快行動，又話保證美國政府會有一系列行動支持佢，郭仲話「需要多少錢，我繼續保證！」等，梁就答多謝，又話美國聯絡靠郭。

有資深民主派人士話，呢條片上個月17日已出街，但到近日先瘋傳，仲要剛好梁頌恆日前公開呼籲人包圍警總，呢條所謂「證據」短片就跟住出，畀晒位建制抹黑反送中有外國勢力，時間有冇夾得咁啱？郭文貴成日吹水唔抹嘴，而且背景複雜，正常民主派人士都避之則吉，但梁頌恆仲認係對方戰友，又多謝郭畀錢支持，呢啲抹黑嘢對中間立場市民影響好大，咁同送子彈畀建制抹黑成個反送中運動有乜分別？真係好難唔令人懷疑佢係鬼囉！