佢𠵱家一星期只喺渣打返三日工，咁梗係只會有三日嘅薪水啦！雖然可以養尊處優，但係唔見戴維思肥咗，面容仲好瘦削，不過仍然聲如洪鐘，仲不時同香港嘅傳媒老友講吓笑。
聽佢講，原來同渣打份合約有5年。早前渣打已經講明，呢位光頭主席，連同行政總裁冼博德及財務董事RichardMeddings三人，離職前要有成年通知，聽落都幾困身。
今個禮拜日，渣打會搞一年一度嘅馬拉松，屆時戴維思已經飛走咗，不過另一位執行董事狄朗維將會飛嚟，參加半馬賽事。戴維思話，呢趟短暫來港，同過政府官員同客戶見面，當中唔少得嘅係正競逐連任嘅煲呔曾。
[email protected]