新戲影射成龍大哥? 陳奕迅:有都係唔覺意,唔係特登
成龍陳奕迅李一桐
由谷德昭執導,陳奕迅(Esaon)、陳國坤、李榮浩、李一桐及劉浩龍等主演嘅動作搞笑電影《臥底巨星》,今日喺西貢進行造型拜神儀式,陳奕迅一身粉紅唐裝成龍look 出現,將成龍嘅「龍」字配飾改為「豹」字,其鞋上亦印上豹字等。
問佢套戲係咪影射成龍?Eason話並非單一係成龍,可以係洪金寶及其他外國打星,但Eason就即場扮成龍嘅誇張表情,維肖維妙,Eason話:「唔係完全係成龍,係好標誌嘅動作巨星,只係造型上氣牆大啲。」扮演武打巨星嘅Eason ,自言原來自己嘅動作不太靈活,但扮成龍嘅小動作卻似模似樣,Eason話:「可能自己唔覺,但細個睇開佢啲戲,實有啲影子。」對於怕唔怕被成龍指醜化其形象,Eason話:「就算有都係唔覺意,唔係特登,我諗導演識剪,希望大家笑到濕晒。」
喺最新一輯《射鵰英雄傳》中,扮演黃榕嘅李一桐,首次參與電影拍攝,李一桐話:「今次做一個簡單女演員,性格活潑開朗。跟榮浩有感情線。」李一桐話唔怕對方女友楊丞琳呷醋,因為只係工作,而且歡迎對方隨時嚟探班。知道香港正播放《射鵰》,佢話:「很感動,香港人非常熱情,希望多來香港合作。」
陳國坤同Eason有不少動作戲,佢話Eason有接受訓練,對Eason有信心,又話Eason會錫住佢嚟打。陳國坤兒子陳真15個月大,陳國坤話想追多個,佢話:「努力緊,等陳真大少少,我就想仔女都冇所謂,最緊要老婆肯生。」