超人得力助手、「打工皇帝」霍建寧近年似乎鍾情於電動車Tesla，繼之前一部紅色Model S，最近又換新車。噚日佢以電能（006）主席身份出席股東會，離開時順便晒一晒佢部最新款白色Tesla Model X。
呢架白色巨無霸舊年底在港出貨，作為最大賣點嘅Falcon Wing鷹翼車門噚日可謂盡顯身價。話說霍大班離開時，被大批記者圍住追訪，大班人逼近車門時，Model X仍有足夠空間將門徐徐升起，霍大班應該都覺得好滿意，上車後，嘴角露出一絲得戚笑容。

慳百萬首次登記稅

根據運輸署資料，呢架美國電動車Tesla Model X舊年出廠，約127萬元，屬於最貴嘅P100D，車門之外，另一賣點係起步快，靜止起步至時速100公里只需3.1秒。

政府上月底公佈最新財政預算案，大減電動私家車稅務優惠去到得番9.75萬元，霍大班今次除咗早買早享受之外，亦慳成百萬首次登記稅。不過又咁講，霍大班年薪2億元，就算畀埋百零萬元稅款，都只係佢4日人工，跌都跌咗喇。
講開又講，霍大班有兩架「大班車」，車牌分別用佢英文名，「CANN1NG1」同「CANN1NG」，呢架係「UM809」，唔知會唔會換自訂車牌？

李華華
mailto:[email protected]