今次小圈子選舉，令人睇清楚原來除咗狼振英之外，政壇仲有好多件變色龍。就係呢班牆頭草出賣咗香港人，令到隻狼可以登基，隨時會蠶食我哋嘅核心價值。所以呢，好多網民都同仇敵慨，話要抵制嗰啲忽然轉軚挺狼選委。

八方有老友就講笑話，日後就算全世界冇晒醫生，得返蔡堅一個，病咗都唔會搵佢睇病。咁又係，鬼叫醫學會咁離譜，係咁依做個簡陋民調，狼振英支持度得嗰三成幾，個會都夠膽將15票全票畀晒隻狼，呢啲咪叫做強姦民意囉。又好似新世界純官咁，有人就不齒佢忽然投狼，話日後要罷搭新巴，唔買新世界嘅樓。
不過，好似工聯會嗰班政客咁，就真係要等到今年9月立法會選舉時，先可以票債票償啦。其實睇返佢哋啲嘴臉，都相當搞笑㗎，好似工聯會議員黃國健咁，呢頭幫阿爺㩒掣，投完票畀狼振英，轉個頭就走出嚟扮反對派，話擔心7.1會有好多人上街。
嘩，如果7.1民怨升溫，工聯會、民建聯呢保皇黨，都唔使旨意甩身呀。