是日個市算係平靜，恒指最低17010，守住萬七大關，埋單跌61點。暫時大跌可能性唔大，要升則又冇乜動力。短線做嘢，可以諗吓細細注做「賊」嗰邊，揀P輪落手。
建行P輪3463：建行（939）收3.40元，跌3仙。今日派半年成績表，咪買C輪住，驚盤數見光後正股有沽壓。諗少少P輪3463。隻輪明年2月中到期，輪價23.1仙，溢價4.7%，槓桿率14.7倍（有效7倍），引伸波幅23.7%。
另1隻喺11月中到期嘅P輪3892數據亦唔錯，但昨日已升5%。3463昨日則只升1格，比起上嚟，值博率高啲。
3892輪價22.7仙，溢價3.4%，槓桿率15倍（有效8.2倍），引伸波幅27%。

中行P輪9450：中行（3988）收3.41元，跌兩格。個市冇乜氣氛，牛皮股揸家揸到冇乜耐性，可能會掟貨出街，吼中行P輪9450，搵餐晏仔。隻輪明年1月初夠鐘，輪價49.5仙，溢價0.7%，槓桿率6.9倍（有效5.2倍），引伸波幅25.2%。隻輪已經平水咁滯，唔怕輸溢價。另1隻可以諗吓嘅P輪，係9476。
中企P輪3690：H指上周五見過7094，昨收6960，單日跌51點，估計仲要調整些少。搵P輪買，吼3690。隻輪10月下旬到期，輪價13.6仙，溢價2.6%，槓桿率16.5倍（有效9.6倍），引伸波幅26%。
章盛