阿九後援會委員蘇建名同八方講，佢哋對小馬哥當選信心十足，所以已經買定香檳，準備為國民黨重新上台執政舉杯，八方聽佢興奮語氣，都感受到台灣選情緊張氣氛蔓延香港。據蘇建名講，香港大約有幾千個泛藍支持者或所謂「自由人士」，大部份合資格選民已到台灣投票，少數人因工作在身或其他原因唔能夠成行，由於大家都好關心選情，急於知道結果，所以佢哋今日下晝3點半，喺粉嶺聯和墟和泰街43號2樓香港番禺同鄉總會會址，舉行馬英九勝選慶祝大會。
蘇建名估計今日大會有幾百人參加，台、港阿九後援會成員亦會透過網絡連線講吓選情，歡迎市民到場，一齊見證小馬哥當選歷史時刻。香港泛藍擁躉對小馬哥當選信心十足，據講已安排今個月28號舉行大型祝捷會，甚至有人已預訂機票，組織觀禮團5月去出席總統就職禮。民進黨執政後，台、港官方交流接近中斷，蘇建名話唔奢望小馬哥可以嚟香港謝票，但希望港府做多啲工夫促進兩地關係，話晒小馬哥都係「港產」，港府唔應該太不近人情。