當年今日
關於我們
【紅軍喜訊】FIFA病毒3將中招 愛華頓慘慘豬
蘋果日報 2017/03/29 13:25
利物浦
阿根廷
愛華頓
史密斯高文
高文、富尼斯摩利同麥卡菲齊齊瀨嘢,愛華頓都算黑仔……
盧卡古對俄羅斯匆匆踢10幾分鐘,總算安然無恙!
英超禮拜六戰火重燃,頭場就爆發「默西塞德郡打吡」,由利物浦主場迎戰愛華頓。本來雙方實力半斤八両,但紅軍有英格蘭中場拉爾拉拿隨時唞一個月,仲有菲臘比古天奴同羅拔圖法明奴呢對「巴西孖寶」返到南美踢世盃外,要勞煩球隊派包機接送,聽落好蝕章,點知「拖肥」呢邊仲衰,成為「FIFA病毒」最嚴重患者!
繼愛爾蘭右閘史密斯高文上周五喺世盃外歐洲區俾威爾斯嘅尼爾泰萊鏟到斷腳收「咧」,本來腿筋有傷嘅愛爾蘭中場占士麥卡菲又頂硬上接受國家隊徵召,結果熱身時加重傷勢要唞幾周,加埋阿根廷中堅拉美路富尼斯摩利喺周二世盃外南美洲區作客玻利維亞一戰,踢咗唔夠半場就因膝傷被擔架抬離場,一個國際賽期傷3件都咪話唔邪……好彩家陣以21球領先英超射手榜嘅比利時前鋒盧卡古,周二對俄羅斯嘅友賽只係後備入替踢咗10幾分鐘,總算冇傷冇病強戰紅軍!