國際足協剛公佈了「FIFA年度最佳男子球員」，遊戲《PES 2020》封面人物美斯，壓倒事前大熱《FIFA 20》封面人物雲迪積克奪魁，咁《PES 2020》又有冇能力擊敗或追上《FIFA 20》。

計推出時間，《PES 2020》比《FIFA 20》早出兩星期，搶飲頭啖湯；而且今年《PES 2020》高調搶得C朗拿度壓陣祖雲達斯的獨家授權，令到一向強調真實性的《FIFA 20》不能提供祖雲達斯實名，只能以「假名」Piemonte Calcio取代。不過就算搶得到祖雲達斯，《PES 2020》仍然有好多球會、聯賽都因為授權問題而不能以實名顯示，真實性自然大打折扣。

《PES 2020》遊戲模式仍然比較單調，只提供eFootball線上比賽模式以及一直以來的傳統Master League。過場動畫算係做得唔錯，不過廣東話評述（須轉用中文介面）就認真唔覺是賣點。《FIFA 20》FUT玩法本身已有大量Fans，今集改動不大，只是提供更多獎勵任務。不過儲球員組織Dream Team仍然是玩家至愛，初步睇，目前最高身價現役球員仍然係C朗拿度。《FIFA 20》新增 VOLTA街頭足球玩法，實情可當成另一款遊戲看待，之後會再講。至於新增兩款對戰模式「King of the Hill」和「Mystery Ball」都算幾有趣，前者要在特定區域盤球儲分，在分數下跌前入球隨時可當成入兩球或三球計算；而「Mystery Ball」就會當足球出界或變死球時改變效果，如可提供傳球、射球、運球等效果，實試後提高速度先係最有用。

兩款遊戲最好的對決方法，就是各玩一項相同設定的球賽，記者就用上英超兩強對決：利物浦對曼城，兩款遊戲都能用上真實利物浦主場晏菲路球場，球場設計都幾像真。不過《PES 2020》因沒得到授權，兩隊球衣都是「仿真」設計，明顯不及《FIFA 20》。再睇真啲，《FIFA 20》上兩邊球門後的觀眾席，都分別劃分了主客兩隊的球迷區，各有穿上該隊球衣的球迷打氣；相反《PES 2020》球迷衣着就不統一。

《FIFA 20》今集將遊戲節奏減慢，製作人早前說是為了讓大家可以有多點時間使出假動作等絕招；《PES 2020》在假動作方面都唔弱，使出亦不太困難，但感覺上是運球過人有點容易，球員之間的對抗性唔夠，而且敵我雙方的防守都有點笨。這方面都不算最大問題，記者覺得最大分野是「氣氛」，《PES 2020》重播時角度有點奇怪，球員特寫時表現也不多；相反《FIFA 20》氣氛好得多，球員會七情上面，甚至連兩軍領隊高普和哥迪奧拿都有大特寫，老實講，《PES 2020》仍然追唔到《FIFA 20》。

最後講埋《FIFA 20》的VOLTA街頭足球模式，甚至取代了原來故事模式「The Journey」。雖然這個男女混合的新故事模式可到世界各地街場踢館，亦可招兵買馬，兼可購買裝備，玩法都唔少，但始終香港玩家不太熟悉遊戲中的街頭足球文化，投入感會打折扣。反而用現實球員玩3打3就更有睇頭，一來一回速度高，亦比11人賽事容易做到花式，入球又多；不過要留意的是圍板場龍門較小，射門儲力時不用儲太多，按R1（PS4）Finesse Shot射門就更有效。

記者：布偉倫
編輯：鄒仲安

-----------------------------
【撐學生】
召集有心人 撐學生全年睇《蘋果》
立即按此
-----------------------------
《囚牢之疆》 專頁
揭開集中營邪惡面紗
今日新疆 明日香港