齋影景唔影人嘅《瞬間看地球》受歡迎，類似節目有個土炮版本，就係天文台「香港分區天氣」照片，分別在於全港11個地區有「天眼」，每15分鐘影一張相，連續播放就睇到天氣變化情況。天文台最近喺長洲安裝咗一部攝影機，竟然俾台長李本瀅目睹驚險鏡頭，隨時變成死亡直播。

風高浪急仲有人滑浪

天文台嘅攝影機用嚟監察長洲附近天氣同海面情況，今個月11號下晝影到兩張相，畫面嚇親台長。佢喺自己個blog度話，當時熱帶風暴蘇廸羅正逼近香港，天文台已發出熱帶氣旋警告訊號，長洲海面有兩米高白頭浪，顯示正吹強風，不過令佢最驚奇嘅，係竟然見到風高浪急之際最少有10個人滑浪。
中國人傳統智慧欺山莫欺水，不過台長話公眾似乎唔多在意天文台因應大浪同暗湧而發出嘅水上運動警告，即係話市民只顧追風，卻當佢忠告係耳邊風，身處險境反而樂在其中。台長呼籲市民「不要玩命！」

台長擔心警告冇人理

日前颱風莫拉菲只差40公里就正面吹襲本港，八方記得當日天氣有啲奇怪，日頭氣溫酷熱，市區氣溫有34度，新界有啲地區更錄得37度高溫，好多人懶理打風湧去海灘消暑，台長指當時傳媒拍攝嘅相片或影片，市民喺海灘似乎玩得好歡樂，其實情況十分凶險，因為每逢打風政府都會呼籲市民遠離岸邊，呢啲警告，顯然冇乜人理會。
市民玩命代價不菲，根據天文台紀錄，過去10年有12人喺打風期間死亡，其中三分之二同水上活動有關：六人當時游泳或滑浪，一人正在釣魚，另外一個係休班消防員，因為拯救一名喺大浪中游泳嘅市民而葬身大海，因此台長見到風中滑浪場面咁緊張係有道理嘅。
李本瀅秉承前任台長林超英寫blog做法，佢上任後另一新猷係將天文台網頁改版，將市民最常瀏覽嘅天氣資料放在一個版面上。天文台網站去年瀏覽數字超越13億次，惡劣天氣日子，單日瀏覽數字更高達1,500萬次。
mailto:[email protected]