閣下認為成功最重要嘅元素係乜呢？運氣？實力？儘管無乜球迷覺得前AC米蘭嘅丹麥前鋒湯馬臣係頂級射手，但偏偏自出道至今，佢都不愁無班落，西甲球會維拉利爾周三向德甲史特加借用此子，並造就佢成為歐洲球壇第5位先後效力4大聯賽嘅紅人！
湯馬臣18歲喺荷蘭海倫芬冒起，自此星運亨通，輾轉間效力過紐卡素、飛燕諾及AC米蘭等名牌球隊；05年，史特加好有勇氣咁硬執佢番嚟，希望佢幫球隊起死回生；殊不知，「老湯」兩季入球加埋都係單位數，今季仲食白果㖭！不過，唔到你妒忌，「老湯」係繼「羅馬尼亞孖寶」列度斯奧、樸比斯古及葡萄牙「獅王」沙維亞同喀麥隆守將禾美後，第5位喺4大聯賽踢過波嘅球員！
好醜命生成，有啲球員死搏一世，職業生涯都未獲過國家隊垂青，但「老湯」從來係有麝自然香嗰類，無論喺球會打正選定後備，入唔入到波，丹麥選人點都預埋佢，30歲嘅佢已擁有80幾頂喼帽，認真巴閉！