上季楊明綸同鄭雨滇兩位華將大部分時間養傷，加埋莫雷拉殺到，華將好似有比下去嘅感覺。但今季滇仔同楊明綸騎得番，而且分別試過起孖，仲有何澤堯又騎番出信心，如果上述幾位華將唔再有不愉快事件發生，應該係豐收嘅一季。
相比下蔡明紹今季居然仲未開糊，稍稍有啲令人失望。不過佢師傅告東尼亦不過只贏一W，就當佢哋兩個仲未發動攻勢啦；今期博吓佢匹「加州金鑽」 (CALIFORNIA ROCK)，力短馬上次跑1200米，放到最後200米先斷，可以當試課大閘。今仗匆出跑直路賽，難得有運抽到11檔起步，大有機會搶出貼住條欄一放到底，五班水兵鬥海軍場合，未必有馬可追上嚟過佢。
此外，莫雷拉跑三次馬都成為騎師王，唔到你唔服，今次佢手馬依然好惡。馬華力睇好佢匹「威勢之寶」，上次唔係胡廐出擊主力，今次換莫雷拉肯定有啲嘢睇。胡森兵源少，贏得嘅馬一定搏命，希望吸納多啲新血拉入佢馬房，否則今季又隨時畢唔到業。