當年今日
關於我們

中環在線:
未接掌機管局 蘇澤光先賣口乖 - 李華華

蘋果日報 2015/02/10 00:00


貿發局主席蘇澤光六月一號調任機管局主席,人都未過門,佢就急不及待為第三條跑道呢隻熨手山芋講好說話。
噚晚係佢最後一次主持貿發局周年晚會,回應有人問佢對機場興建第三條跑道嘅意見時,雖然把口就話「不在其位,不謀其政」,轉頭即刻戴頭盔,話用「市民身份」嚟講,佢覺得香港「需要」第三跑。
佢話,當年興建新機場、機場鐵路,都遇到唔少阻力,但睇番今日,金融中心地標IFC、ICC等,都係「機鐵產物」,「如果今日冇機鐵冇赤鱲角,香港會點?」。
蘇澤光仲講到唔停得口,指「時代要進步,經濟要發展」、「早日做早日好」、「有問題有困難唔等於唔應該做,係應該去解決」等等,hard sell到不行。
蘇澤光又話,好感恩自己有機會「飛天遁地」,之前做港鐵(066)主席時「個個月都陪啲人落去行路軌,睇下有冇裂痕、牆有冇漏水」,佢𠵱家就「好期望第日飛天」,賣口乖都冇漏新舊東家,好識做。