邊個咁大面子請到主教慶祝生日？之唔係紀惠集團主席、今年《福布斯》香港富豪排行榜第25位廖湯慧靄囉！事關廖太旗下嘅慧賢慈善基金，今日捐款8,000萬港元畀明愛專上學院，希望支持學院未來計劃升格做香港首間天主教大學，連名都諗埋喇，叫「聖方濟各大學」。而學院嘅商業及款待管理學院同埋社會科學院日後都會以廖湯慧靄同佢母親湯羅鳳賢命名。

曾經做過明愛總裁嘅天主教香港教區主教楊鳴章，今日亦獲邀出席支票轉贈典禮，適逢今日廖太生日，校方仲專登準備生日蛋糕兼全場合唱生日歌。現場所見，廖太家族都全家總動員撐場，名副其實三代同堂啊！

向來對教會都好虔誠嘅廖太話，明愛向來係一所出色嘅專上學院，而全港現時有近15萬名學生現時就讀天主教學校，所以佢支持明愛專上學院升格做全港首間天主教大學。而廖太胞弟，紀惠集團CEO湯文亮仲話，本來佢地打算捐6,000萬。但因為廖太要求兩位弟弟每人捐多1,000萬當生日禮物，所以就將今日捐款加碼到8,000萬喇！

不過，間間專上學院都想升格，你估間間都升格到咩？明愛專上學院校長麥建華就話，廖太嘅部分捐款，已經用作啟用調景嶺新校舍之用。而預計學院升格做大學嘅所需資金要近10億，不過目前都已經籌到接近8億喇。佢仲話，學院入邊嘅商業及款待學院，即將會進行評審。如果學院內3個學院都通過評審，加上幾年間收生人數穩定，咁佢地就會申請升格做大學。佢預期順利嘅話，有望可以喺5年內升格。

而主教楊鳴章就話，期望學院升格做大學之後可以關心多啲被忽略嘅青少年，而且最好應該「做少啲Research，多啲做關於Career嘅培訓。」佢仲話，未來大學應該會相當著重道德操守，唔知仲有3年任期嘅楊主教退休之後，會唔會考慮過嚟教書呢？