今日星期六，下午周秀娜同李克勤去咗人來人往嘅旺角西洋菜南街行人專用區，出席「The Club派100萬張『一日通行證』」活動。

周秀娜話一定會睇世界盃，話晒係四年一度嘅盛事：「我都想親身去現場睇決賽，感受下現場氣氛，相信會好好睇，但撞咗時間要做嘢，同埋啲飛好貴，買唔到，所以就唔去喇。」娜姐又話平時都會陪下啲男仔睇波，「因為屋企好多男人，有哥哥又有細佬，所以成日一齊睇波。同男仔一齊睇波，可以激烈啲，同埋有得討論囉！」

今日本報出咗娜姐投資嘅賣bra店結業兩年 （新聞連結: https://bit.ly/2JaKY5W ）訪問期間問番娜姐，佢就話：「其實兩年前已經結束咗同呢間公司（Laanaa）嘅合作關係0架喇，因為當時覺得大家嘅諗法唔同，所以就不如結束呢一門生意，所以就退出咗喇。」咁即係合作咗幾耐？佢話：「我唔係好記得喇，只係記得幾時結束咗。你問我佢公司內部嘅嘢，我就唔太清楚，亦唔方便答。」

問娜姐是否「損手離場」？佢就話冇蝕錢：「仲有錢賺，不過賺幾多就唔記得喇。因為嗰時啱啱開店，主力係網上生意，成績都幾好，回咗本賺埋錢。但後來佢哋想開地舖，我就覺得自己冇咁多時間兼顧，而且香港租金人工都貴，需要好多支出。」

那對方是否要求娜姐「加碼」投資？娜姐未有正面回應，只稱：「因為最開頭我只係想集中網上生意，既然想法不一致，咁不如暫時分開。」結束合作後，娜姐都冇再為此公司代言。

問到依家可有其他生意？娜姐話冇：「做生意要親力親為，冇時間睇，專心做好自己嘢先。」對於該公司兩年前爆出拖糧事件，娜姐稱冇聽過：「每次開會都係傾下有咩新款式，冇聽過拖糧事件。」