朱慧敏今晚以護乳大使身份去到西灣河文娛中心出席「粉紅粵韻傳愛心」活動，佢話自己家族嘅乳癌基因好高，婆婆、媽咪同阿姨都先後因乳癌離世：「今晚我以過來人身份支持活動，我每半年就會做一次身體檢查，好勤密去check，女性最重要保持良好情緒，心情好病痛都少啲，尤其係子官頸癌、乳癌呢啲女性癌病，都同情緒有關。」

其實朱慧敏兩歲時父母已經離異，同媽咪相依為命。04年參選港姐得亞軍，當時已患乳癌嘅朱媽媽同日籍老公，都有到場為囡囡打氣。性格堅強嘅朱慧敏時刻都保持好心情：「我喺好多事情上未必可以改變到，但會積極樂觀去面對，病痛都少啲。呢個會有個粉紅天使，以過來人義工身份陪病患去做化療，其實我都好想去做，但自己好眼淺。」佢坦言有時都會回憶起當初照顧家人嘅情景：「婆婆有病時我仲細，記得放學就去探佢。我陪媽咪去醫院做化療，我鼓勵媽咪之餘，佢亦鼓勵我，從來唔會喺我面前流過一滴眼淚，我希望以過來人身份，幫到有需要嘅姊妹。」

精選娛聞，喺晒《娛果》
http://fb.com/appledailyent