當年今日
關於我們

隔牆有耳:羅致光自爆密會蔡伯勵
相約天台窺探天機 - 李八方

蘋果日報 2018/12/20 05:20

隔牆有耳風水羅致光蔡伯勵羅庚

有神童局長之稱嘅勞工及福利局局長羅致光(CK),向來以科學為本,數據先行,但原來對風水命理都有研究。CK噚日同傳媒茶敍,講開原址重建展亮技能中心,自爆早年觀塘展開重建計劃時,曾應市建局邀請,跟已故堪輿大師蔡伯勵上去apm頂樓睇整個重建佈局。但天機不可洩漏,究竟蔡伯勵點睇觀塘重建,羅居士話不能引述。

既然講開風水,八方就好奇,耗資5,000萬元興建、爭議甚大嘅觀塘音樂噴泉,未見水,先散財,能否收聚財之效,CK就話唔可以咁睇,但亦有依據,因為音樂噴泉所處位置,正當太陽西斜處,當陽光接觸水後會釋放負離子,「個環境就會令人好舒服」。
自稱細細個已識睇掌相
學者出身,CK話其實風水同科學都有關,例如好多祠堂都面向西方,門前通常都有水池,原理一樣,當陽光接觸水,釋放負離子,便可減低陽光侵蝕祠堂的木建築;而門後就是天井,常作生火之用,天井後面係正廳,最後就係擺放祖先靈位,整個佈局正配合五行學說,即金生水、水生木、木生火、火生土、土生金,相生相剋。

CK同八方講,自幼已經識睇掌相,40歲起去學《易經》,對風水命理一直都有研究,前立法會主席曾鈺成長孫個名,都係出自佢手筆。佢仲自爆喺office放咗個羅庚,究竟政總office風水好唔好?羅居士就話冇睇過,仲補一句,「使乜用羅庚睇」,果然係IQ 160。

李八方
empty