內地突加息，令投資者頗震驚，一來在過去兩個月即使CPI已超越3%警戒線，官員仍話通脹可控，二來人行行長周小川一周前才表明今年內中國不會加息，今次舉動令市場一地眼鏡碎。消息公佈後，當晚美股便造出兩個月來最大跌幅，美滙亦急速反彈，若前日見大市快速回升而追了貨過夜都咪話唔驚。但市場未算恐慌，A股低開接近2%後倒升收市，而港股在10天線以上行了32日後，終借消息回調，觸一觸10天線，但在上大人帶領下，亦從低位反彈，期指只下跌256點，以消息的震撼度，港股跌幅算輕微。
中央在五中全會後及公佈9月份CPI前加息，相信是見到通脹有失控危機，加上全球資金氾濫，有需要收緊流動性，控制熱錢，同時希望向美日等國顯示自己並不願意玩貨幣遊戲。

多貨投資者宜先減磅

不過，如意算盤要打得響並不易，在全球仍處相對低息情況下，息口上升自然令貨幣吸引力增加，加上市場對人民幣早有升值預期，此情況下反催使更多熱錢流入，最終通脹隨時會推得更高。以過往經驗，在經濟復蘇後初次加息通常會先令股市跌一跌，但震倉過後，大勢仍向上，因此中長線走勢應不用擔心。
雖然大市長遠看升，但多貨的投資者亦不可掉以輕心，期指昨雖然即市曾在低位回升接近400點，但最終只做十字星，普普通通，而且好多時加息後大市唔會一日便跌完，因此多貨的投資者或要考慮減磅套利，以免在大市下跌時無力加注。同時，投資者亦要繼續吼實滙市及金市，若見美滙指數再跌至近日低位76.14附近，大市卻已破頂時，大家便應意識到大市強勢，不可逆勢而行，至於黃金，前晚在消息公佈後即從高位下跌40美元，都唔好話唔嚇人，但投資者若見黃金迅速收復失地，到時大市應該又會拒絕下調，繼續尋頂之旅。

張士佳
寶來證券（香港）董事　投資服務部
mailto:[email protected]