季尾人疲馬倦，馬匹出賽配見習騎師有磅減，經常佔到上風，今午（25日）最尾第十場正係最佳反映。

第十場三班1400米賽事，「火車潘」見習騎師潘明輝策騎師傅賀賢馬房旗下「福愛寶」後上掄元，單Win及組合獨贏A2分別派52及27.5元，潘明輝師兄黃皓楠騎沈集成馬房「健康歡笑」跑第二，呢條見習騎師連贏有370.5元派彩，相當和味！

「福愛寶」上仗由潘明輝贏同班同程1400米加七分，今次毋須升班，繼續有十磅減，負122磅不重，早段居甚後，結果直路殺上甚勁，贏頸位再下一城，人馬合作四戰兩冠兩季全上名，此駒亦創出近七仗三勝四位百分百入圍。

潘明輝食尾糊前，已憑賀賢另一駒「威力名城」爆冷勝出第四場，全日埋單兩師徒聯手起冷孖，表現出色。

第十場二至四名由「健康歡笑」、「世界紀錄」及「中華之光」順序取得，四重彩派一萬三千幾。騎師王由莫雷拉以54分勝出，拋離最接近的潘明輝多達18分。