韓國tvN綜藝節目《名單公開2017》噚日播出最新一集，今次節目組就盤點韓星最鍾意嘅旅遊地方，最受韓星歡迎嘅地方原來係法國巴黎及東南部港口城市尼斯（Nice），就連最多夫婦揀去度蜜月嘅地方-夏威夷都只係排第3名。

據節目透露，韓星最鍾意去巴黎及尼斯旅行，特別係尼斯一年四季都氣溫暖和，所以都好吸引藝人去度假。據悉問題多多嘅Sulli之前就曾經孖演藝人好友佳仁及具荷拉去巴黎旅遊，而韓劇「收視女王」孔孝真前男友柳承範亦不時去巴黎度假；至於模特兒張允珠於前年結婚後，就選擇同圈外人老公去尼斯度蜜月，而《奇皇后》河智苑、《回來吧大叔》李荷妮等女星亦都好鍾意去尼斯旅行。

其次最多韓星揀嘅旅遊地方就唔係海外，而係韓國近郊地區江原道。近近地江原道同樣有海睇，又有得食新鮮嘅海鮮，所以男團東方神起Max及同門好友Super Junior嘅圭賢於2014年亦曾經去江原道玩並住宿，由於地方唔遠更吸引粉絲去追星0添，同時張東健及高素榮夫婦、Tablo及姜蕙姃夫婦及蘇有珍一家都經常去江原道散吓心。

至於集觀光、Shopping為一地嘅夏威夷，就因為係唔少韓星度蜜月嘅地方，所以獲節目組揀為第3名。當中今年3月出嫁嘅韓國元祖女團S.E.S成員Bada、上月新婚嘅朱相昱及車藝蓮夫婦、去年嫁圈外人嘅女團After School前隊長嘉熙等都係去夏威夷度蜜月，而女星李惠英、韓劇《伊甸之東》女星韓智慧當時亦飛到夏威夷舉辦婚禮。夏威夷除咗吸引情侶、夫婦及，單身人士如SHINee成員Key、天團BIGBANG嘅G-DRAGON及大成等都會去夏威夷玩水上活動。

印度就係韓星最鍾意去嘅旅遊地方第4名，據節目透過，韓劇《看見味道的少女》女星尹珍序及《誘惑》女星朴河宣特地去印度學習瑜伽，更成巧考取資格證；至於男歌手Eric Nam同樣於印度進行奉獻活動時，參加選秀節目《偉大的誕生第二季》後勝出並成功出道；節目盤點嘅第5位就係澳洲，權相佑、孫泰英夫婦及《無限挑戰》前主持人鄭亨敦亦鍾意到澳洲度假，權相佑夫婦更於當地購入約17億韓圜(約1,167萬港元)嘅別墅，方便日後到澳洲旅行時居住，據知權相佑、孫泰英夫婦每年都會去澳洲旅遊一次。

至於準媽咪金泰希、女星金娜怜、男星池珍熙就鍾意去充滿歷史文化、藝術及時尚氣息嘅意大利，令意大利排第6名；同樣位於韓國嘅南海郡就排第7名，韓流天王裴勇俊及女星朴秀珍結婚後亦係喺南海郡度蜜月，同時據悉宋承憲前年曾孖女友劉亦菲及家人到南海度假。