【李華華搶先看】超人也吃驚 同孫女拍拖食晏咋!
李嘉誠超人派錢DSE李華華李燕寧
呢兩日全城熱議嘅心邊新聞,當然係「超人」李嘉誠拖埋21歲孫女李燕寧(李澤鉅長女)到馬場一遊喇。一來超人係馬場稀客,近廿年絕少現身馬場;二來李家一直將第三代收得好密,孫女可以話從未以真面目示人,日前首度露面,大家先知佢咁秀氣。
正當大家八卦緊,何解超人忽然帶孫女「出場」,有人就報料話,超人噚日打開報紙(係呀,超人仲睇報紙㗎),見到咁多人寫,都嚇咗一跳。聽聞,佢只不過係打算帶孫女去馬場見識,拍拖食餐晏仔,皆因孫女未去過馬場,成件事就係咁簡單。
換句話講,佢哋並非應任何人邀請,亦冇約過任何人咁。雖然成件事聽落有啲莫名其妙,Any肥,超人同孫女拍拖呢件事,係好sweet嘅。
超人又點止對孫女好,佢對全港應屆DSE考生都好好㗎!講緊佢旗下李嘉誠基金會早前宣佈,派錢畀明年考DSE嘅學生哥,第二期5,000蚊現金支票噚日喺位於屯門區嘅學校開始發放,逾9,300名學生受惠。
但基金會伺機詐型,話上次派完錢後,向受惠中學與考生派發問卷,可惜喺「多番呼籲大家積極回應下仍只有33%的回收率」,令人焦慮。咁又係嘅,畢竟基金會講明,問卷結果會影響成個計劃嘅延續性同方向性,仲講明派埋今次會再調整成個計劃方向,咁今次同學仔記得畀心機填問卷呀。
蘋果財經,關心你飯碗
http://fb.com/appledailyatm