連鎖服裝集團佑威國際（627）因財困被清盤，據聞主席梁鄂送畀佢老婆嚴玉琳嘅兩個紅磡豪宅單位，早排又俾銀行收番，淪為銀主貨。
華華收到風，其中一間啱啱喺噚日賣咗，太陽物業萬小春話，件銀主貨係海逸豪園20座中層D室，1137方呎，銀主月初嗌價600萬。
可能見個市唔好，擔心冇人要，所以先肯劈價，最終以563萬元賣出，減咗6.2%；呎價4952蚊，比市價平咗都有一成。呢件貨，嚴玉琳上年9月買入價係600萬。
梁太似乎對紅磡豪宅情有獨鍾，另一件淪為銀主貨嘅單位，係摩天豪宅海名軒1座極高層B室，2551方呎。有經紀話，呢件係屋苑靚貨之一，全海景，但銀主開價唔平，要成3800萬，呢排豪宅市場又冇乜起色，咁大件貨要搵人接都幾難，除非銀行肯劈價啦。