連州團車禍，其中一名團友茹先生憶述事件說，昨晨11時許，旅遊巴離開服務站，前往午飯地點，開車半小時，在清連高速陽山段行駛。當時「有雨水，濕濕地，坐坐下架車擺動，擺咗去左邊，彈埋中間石壆」。茹馬上將身體縮在椅子下，以防被拋高受傷。「『boom』一聲，就彈去右邊石壆，倒後鏡又掹埋啲草出嚟，再反彈去中間石壆，我以為會碌落山...跌到暈陀陀。」他指旅遊巴如彈珠般，先後三次撞石壆。

茹先生續讀，事故中有5人被拋出車外，包括前面兩排的4名團友及內地導遊。「個導遊飛咗出去，但件衫掛喺條腰度，勾住佢，變咗揈返去車底」，稍後有團友協助，將他拖出車底。茹形容：「車入面好亂，有人撞到頭破血流，有人腰骨折、手腳骨折。」茹先生聞到有油味，擔心漏油、爆炸，又怕尾隨車輛收不及撞上。有途經救護車，馬上上車躲避。

他指當時路面有油漬：「好滑，行路都驚會跌。」事發後有車輛經過，但未有幫忙，直至一輛紅色車，一對年輕夫妻停下幫忙，並派水給他們飲用。

經歷驚險車禍，茹先生猶有餘悸，但信心未失：「國內旅行都應該冇問題，起碼出事都有人接返香港。」

想睇最新消息？　即時follow【現場－蘋果突發】 fb！ http://fb.com/applecitycrime