王宗堯、岑麗香、胡琳、林汶慧、陳詩慧、黃芷晴、Jocelyn噚晚喺銅鑼灣FashionWalk出席手錶品牌Baume&Mercier概念店開幕禮。

活動現場有模擬賽車比賽，宗堯話佢細佬本身係整模擬賽車嘅儀器，所以佢話有時會同細佬交流吓。講到賽車，王宗堯咁大個仔都未試過，佢話：「真係落場賽自己想試下，19歲考到車牌都唔夠膽揸大膽車，細個老竇好緊張，唔俾我上車，同埋有時去曳曳或者飲嘢都唔會揸車啦！」

咁小心，王宗堯咪好少車震，佢話：「飛鵝山咁多差人，你哋消息又咁靈通，如果係不如返屋企舒服得多，又有冷氣，又唔駛架車又咿咿嘅嘅聲，又要吸一氧化碳，雖知香港土地供應問題，好多人鍾意玩呢啲，但係我自己就盡量避免。」

夏天，靚女係騷身材嘅時候，岑麗香著住背心低胸裙示人，問佢去沙灘係咪都會三點式示人，佢話：「性感留番去沙灘，曬太陽先會著三點式。」咁會唔會俾男友私有化，香香即話：「比堅尼俾自己睇，之前同男友見面天氣冇咁熱，我哋有其他活動，踩單車，食飯。」

咁有冇打算送錶俾男友呀？佢話：「值得紀念嘅日子先會送，情侶錶係好SWEET嘅事，有時喺街見到人著情侶裝，好似好幸福，但係未必個個男朋友接受到。」咁你男友介唔介意先？香香話：「男友唔介意，朋友會笑我哋，亞洲人會有人鍾意著情侶裝，加拿大美國會俾人笑，同款衫都會俾人笑，外國未必接受到呢啲嘢。」