日本女星綾瀨遙近年擔正劇集及電影都成績麻麻，佢主演嘅NTV電視台新劇《太太，請小心輕放》下月開播，據知劇集本來以婚外情作賣點，不過臨時改劇本，安排綾瀨遙扮演充滿正義感嘅「史上最強人妻」角色，拍住西島秀俊扮夫妻，同劇拍檔仲有廣末涼子、本田翼，雖然陣容一啲都唔弱，但面對今季日劇有多位一線女星對撼，包括篠原涼子、米倉涼子、小泉今日子、井上真央等，令到綾瀨遙造成一定壓力。

電視台近日已為《太太，請小心輕放》展開宣傳，除日前公開預告片及開設官網外，更有綾瀨遙同西島秀俊嘅夫妻劇照曝光。另外，37歲嘅廣末保養得宜，忙於拍劇嘅佢日前被發現搭的士到澀谷區，但係落車時佢一度摷唔到銀包，並露出既尷尬又可愛嘅笑容。