日本女星酒井法子曾在90年代紅遍亞洲，可惜2009年與前夫高相祐一驚爆吸毒案，令呢位東洋玉女掌門人一度形象插水。酒井歷吸毒被捕後，46歲嘅佢獲中港台fans不離不棄，近年佢全面復出就先後到中國、香港、澳門等地吸金，無論邊度開騷都得到大中華粉絲一呼百應，單係開dinner騷已賺到豬籠入水。

酒井入行30周年，佢於10月初會演出舞台劇，明年更會在港舉行演唱會。昨日，酒井亮相TOKYO MX電視節目，佢談到自己出道30年就話：「發生了很多事，對不起！」酒井邊講邊輕輕垂頭，於螢光幕再次為吸毒風波道歉。酒井亦有提到宣佈引退嘅安室奈美惠，仲自爆去年對方開騷都有捧場，而節目播出後，不少觀眾都大讚酒井多年來都冇點走樣。