日劇天后綾瀨遙自從同松坂桃李傳出分手後，近期感情生活好似冇乜着落，身為大忙人嘅佢都係影視兩忙，最近仲同藤岡靛組成嶄新配搭，為保險公司拍廣告。

今日嘅《東京Sports》報道，綾瀨遙最近每逢去電視台開工，當佢暱入休息室時總係會發出怪聲，而且仲令人在場好多男性工作人員產生FF，一時會「喔~喔~喔~」咁叫，有時就嗌到「吖~吖~吖~」聲，經明查暗訪後，得知綾瀨遙會趁休息時喺房內拉筋。

據聽過綾瀨遙發出怪聲嘅圈中人話：「的確有聽過佢嘅聲，應該係做運動時嘅呼吸聲。」據知遙妹好注重健康，亦有做瑜伽嘅經驗，佢平時喺休息室會由女助手協助，用注滿兩公升嘅水樽當啞鈴，一邊會做伸展運動，有時仲會做埋空中瑜伽，趁埋位前鍛鍊自己體魄。