NBA嘅「最後兩分鐘報告」（Last Two Minute Report，下稱L2M）可能係世界上其中一樣最無聊嘅嘢，話說聯盟禮拜二又出咗報告，指球證喺勇士贏騎士場聖誕大戰嘅末段，睇漏咗幾次杜蘭特（Kevin Durant）對勒邦占士（LeBron James）嘅犯規。但報告都係得個講字，講完就算，其實係乜都做唔到嘅！

根據呢份報告，KD喺比賽最後1分12秒嘅一次埋身接觸影響咗勒邦占士嘅速度、平衡同埋節奏，但球證當場只係判LBJ最後觸球，呢球波變成大帝七次失誤嘅其中一次。L2M亦都指出喺勒邦占士其後嘅一次剷籃，杜蘭特應該有兩個位（分別係比賽最後27秒，同最後25.6秒）俾球證吹犯規，如果球證當時有吹犯規，勒邦占士就有得射兩個罰球，有機會追到只係落後勇士一分。另外，報告又指出喺比賽最後33秒，LBJ蹺住祖蒙特格連（Draymond Green）隻手同扯人件波衫，影響到格連搶籃板係應該要判犯規。

不過，L2M一向都係得個講字，就算聯盟依家有成team人可以即時睇重播又重播都好，類似嘅錯誤仍然係繼續發生，難怪勒邦占士賽後都只係講咗句：「佢哋推翻咗嘅果次判決，KD有兩次犯規囉。不過，是但喇，你仲可以做啲乜先得㗎？」

----------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM