禮拜日朝早，程總裁喺家中係咁refresh財爺網誌，沖緊咖啡嘅老婆大人問我有乜咁好睇，本總裁用一句外星文回應：「我想睇政府同金管局點樣干預銀行運作。」老婆聽到𢱑晒頭，以為我發咩神經。

其實本總裁係講緊今年9月23日財爺波叔公然出口術事件，話說當日係美國聯邦儲備局議息前夕，波叔喺網誌到講咗一句話：「香港銀行跟隨上調最優惠利率（Prime Rate）機會極高。」結果美國加息0.25厘，香港銀行9月26日就加0.125厘，有一間甚至跟足加0.25厘。

一般唔熟金融或政府運作嘅人，可能會覺得波叔上次估得好準；但金融人都知道，睇資金流走、銀行結餘、外滙票據總額等情況，加息需要真係唔高，呢個純粹係政府干預市場運作，向銀行高層施壓，如果佢哋唔醒目加息，咁咪即係落政府面，咁仲點出嚟撈啊？

咁政府要銀行加息嚟做乜嘢？簡單而言就係因為樓價太高，民怨四起，焗銀行加息點都可以牽動淡市情緒，抑制樓價。

作為regulatee，就算有損利益嘅事，基本上你唔能夠唔聽監管機構講嘅嘢，因為發牌嘅係佢，設立條例嘅係佢，你問銀行唔跟監管機構枝笛，佢哋會唔會都冇符？唔通真係吊銷你個牌照咩。

金融人都知道，金管局要令到你聽話嘅方法好多，例如打電話溫馨問候你，鉅細無遺地查你數簿睇下會唔會有咩問題，甚至派人手去你間行實地考察確保運作健全，簡直係溫暖人間。

咁講返轉頭，9月26日至到今天，金融市場、拆息水平、存款結構、同業競爭、存戶感受並無發生重大轉變，other things being constant嘅情況下，美國如果12月19日加0.25厘，香港銀行冇理由唔跟加，否則只係再印證今年9月係干預商業運作。

程總裁打開財爺最新網誌，「終於有更新喇老婆，波叔會唔會又hint加息呢？我哋撈底買多層樓......」頂你咩，今篇講旅遊！

程總裁
www.facebook.com/IFC89

investMAN
For People of Style & Substance
掌握理財智慧 感受生活品味
http://facebook.com/investMAN.hk