難得何超欣出嚟做訪問，除佢「尖子」、「學霸」一面，當然想知多啲佢私人啲嘅一面，若然google「何超欣」3個字，首頁有「靚到不得了何超欣清純造型大集合」、「賭王的小公主何超欣驚艷巴黎名媛舞會」、「學霸兼萬千寵愛的公主！何超欣成人禮隆重出場」、「何超欣顏值高」等標題。

指定題目，當然要問佢賭王爸爸對佢「靚到不得了」加持，超欣就怕羞笑言：「我嗰時都好細個，都係後來先知，希望學習同做嘢都『不得了』。」究竟做「何家千金」有冇壓力？超欣就表示：「壓力都有啲，係我自己想做得比較好，又唔係淨係『何家千金』，所有嘢都想做好啲，自己就會畀到壓力自己，所以壓力太大都會有皮膚敏感。」

舊年11月，超欣就去咗巴黎參加被譽為巴黎貴族社交盛事嘅成人禮舞會(Le Bal)，同場有奧斯卡影后麗絲蕙絲潘(Reese Witherspoon)18歲囡囡Ava Phillippe、美國諧星Steve Harvey囡囡Lori Harvey、法國一級方程式車手阿里斯（Jean Alesi）囡囡Helena Alesi同唔少歐洲國家嘅公主，講到呢次體驗，超欣表示：「平時都好少化妝，嗰度有人幫我哋化妝，條裙都咁大條，我哋成日撞嚟撞去，嗰刻都好似公主。」超欣透露舞會前3日，已經好忙拍攝訪問，佢笑言：「大家一齊好攰，由朝搞到晚，冇機會見過呢啲場面，趣事係我哋直接太攰就坐喺地下、樓梯等，因為大會要準備好多嘢，我哋都好多嘢做，因為要好短時間，做好多嘢，大家一齊去搞會有個friendship，我哋之後都一直有group chat聯絡。」成人禮之旅，四太梁安琪亦有飛去快閃2日1夜陪佢，超欣表示阿媽有提有幫佢：「好似跳舞方面，佢有畀貼士我，因為跳waltz。」

短短3日之旅，超欣同當地傳媒用法文對答，問到係唔係小時候已經要學唔少外語，佢就話：「唔係阿媽要我哋學，係我哋讀boarding school，一定要揀一個foreign language去學，好似西班牙或法文，我就揀咗法文。」除咗英文，超欣還懂得日文，更是因為睇卡通學識，佢說：「一開始識日文喺由細到大同阿哥睇《柯南》動畫片，學下學下就識少少，喺GCSE讀咗一、兩年日文，有上下堂，所以基本幫阿媽叫下餸都OK嘅，佢鍾意食壽司。」

其實，超欣都算係「宅女」一名，又唔似三房超蓮鍾意追星有偶像，平時見到佢都係陪阿媽、家姐出街，亦無網絡「分享症」，佢就話：「我有玩fb、Ig，但係就冇public account，有都係private account，淨係去睇，唔會發表任何嘢，都係睇比較多，亦冇post過任何嘢。」

被笑係「宅女」，小學時候鍾意睇書，睇嘅唔係《Harry Potter》呢類少年小說，反而係睇金庸小說，超欣自言：「我覺得都係spend啲時間喺自己有興趣嘅嘢。」《蘋果》突擊檢查佢iPad，見佢有做功課寫筆記Apps，一啲益智數學遊戲同訓練形狀同空間感嘅Apps外，還有煲劇apps，原來90後嘅佢係宮廷劇迷煲劇：「古裝劇，《延禧攻略》都睇到50幾集，唔係睇佢哋勾心鬥角，最鍾意睇佢哋setting，背景，宮殿、衫同成個歷史，我純粹睇個故事，以前由《還珠格格》開始睇，好細個，都後面《步步驚心》、《美人心計》、《瑯琊榜》、，《射鵰英雄傳》、《笑傲江湖》都有睇，唔同朝代都鍾意睇，唐朝、明朝同清朝都睇，美劇都有睇，同家姐睇《Criminal Minds》（心理追兇）偵探少少。 」

精選娛聞，喺晒《娛果》
http://fb.com/appledailyent