成龍近期推出英文版自傳，一粒字都冇提過佢同吳綺莉生個私生女卓林，唔少網友話佢絕情，佢一於少理，最近佢又喺北京為推出新唱片《我還是成龍》出席記者會，成龍強調呢隻碟係佢唯一有份全程參與嘅音樂作品。為咗滿足fans想親近佢嘅心願，成龍仲搞咗個活動，請fans分享溫暖故事，頭三名可以參加佢新碟發佈會，喺現場聽佢唱live。

今次佢隻碟每首歌都係佢自己嘅故事，每首歌都係唱俾身邊人聽，當中《謝謝一輩子》係佢送俾老婆林鳳嬌嘅，成龍話：「我有份填詞，因為想講一些以前從沒說過的說話，給我生命中最重要的人聽。」《愛情老了》係成龍想向父母表達孝順之情，佢話：「中國人不太願意表達愛，尤其像我父母那一代的長輩，他們不會將愛掛在嘴邊，但其實我知道他們的愛有多深。」

而《別放棄》就係送畀個仔房祖名嘅，皆因佢自從涉毒被捕後，幕前生涯從此玩完，雖然佢自稱轉戰幕後，希望做導演，但至今都未有作品面世，所以想叫個仔別放棄！另一首《物是人非》係過身嘅鄧麗君。《青春故事》係講一班兄弟同成龍生死與共，為佢遮風擋雨嘅兄弟情。

因為成隻碟冇一首歌講個女卓林，佢個女係咁搵佢，但佢完全當聽唔到，網民紛紛鬧爆成龍絕情：「連手足兄弟都有歌聽，但你個女呢？你點做人老竇。」