雖然話天下文章一大抄，但如果抄得太多，最終只會惹嚟惡果。我阿Deep縱橫網海，發現有網友喺香港討論區列出過百張濱崎步抄襲外國歌手嘅罪證，其中以抄麥當娜（Madonna）嘅次數最多，難怪網友睇到火滾。
喺演唱會中步姐嘅corset形歌衫，概念就係嚟自娜姐嘅，你話歌衫如有雷同，實屬巧合，但喺個唱釘十字架唱歌呢個環節都照抄，就冇得抵賴喇！其實除咗造型外，步姐好多MV都老翻娜姐，阿Deep覺得好過份囉。

自己做形象指導

雖然步姐抄娜姐、KylieMinogue、Beyonce同珍妮花洛庇絲（JenniferLopez）嘅新聞睇過唔少，但今勻網友一次過列晒出嚟，真係「大開眼界」。最抵死係步姐連拉姑彭美拉安德遜（PamelaAnderson）都要模仿，難怪網友heyheywhat好失望咁留咗句：「PoorJapanese（可悲的日本人）。」步姐喺香港向來多fans，佢哋力撐偶像只係撞衫，即使要問責都應該係佢嘅形象設計負責，但有網友即時話：「濱崎步嘅形象指導就係佢本人。」見到咁多批評，阿Deep今勻都要將步姐「潮流教祖」之名，降級做「老翻教祖」囉！
網址： http://www11.discuss.com.hk/viewthread.php?tid=5161320

版主：網盜王尊尼Deep
本欄逢周一至五刊出