迪士尼真人版《美女與野獸》（Beauty and the Beast）已於本港及北美上映，其實真人版隱藏咗好多特別嘅彩蛋，除咗向經典歌舞片致意外，有部分要係迪士尼忠實粉絲先會留意到。由於為《美女與野獸》歌曲作詞的Howard Ashman亦為《小魚仙》（The Little Mermaid）及《阿拉丁》（Aladdin）作詞，因此電影亦藏了向這兩部動畫致意的線索，亦有影迷搵到同女主角愛瑪屈臣（Emma Watson）主演嘅《哈利波特》（Harry Potter）有關連嘅場面。

1. 《小魚仙》
貝兒父親莫維斯嘅工作檯上滿佈特別嘅手工藝品，有一件手工藝品係有一男一女嘅小船，係向《小魚仙》一幕致意。喺唱《Be Our Guest》期間，盧米亞叫貝兒打開晚餐餐單，當中有一道菜叫Les Poissons，而呢味菜係解作煮熟嘅魚，亦係《小魚仙》大廚Chef Maurice最愛嘅一道菜。

2.《阿拉丁》
貝兒父親工作檯嘅手工藝品，其中一件係背上有個皇宮嘅大象，同《阿拉丁》有關聯。喺唱《Be Our Guest》期間時鐘葛士華出場時背景嘅城堡同《阿拉丁》嘅堡壘相似，而葛士華亦戴上好似頭巾嘅裝飾。

3.《哈利波特》
《美女與野獸》開場時，貝兒同一名鎮上嘅居民Jean聊天，對方表示「我好似唔記得咗啲事，但我又唔知道唔記得啲乜」。呢句對白，好似《哈利波特：神秘的魔法石》（Harry Potter and the Sorcerer's Stone）中妙麗向奈威解釋記憶球用法，奈威亦向佢講同一句對白。另外，當貝兒喺雪地同野獸摸馬時，有隻白色貓頭鷹飛過，同哈利波特嘅嘿美好似。

4. 向迪士尼創辦人致敬
貝兒同野獸喺城堡跳舞一幕，大廳嘅地下印了W及D字嘅標誌，其實係向Walt Disney致敬。

5. 《仙樂飄飄處處聞》
貝兒穿上藍色裙行上山唱歌嘅場面，同《仙樂飄飄處處聞》（The Sound of Music）中茱莉安德絲（Julie Andrews）唱主題曲一幕相似。電影中隱藏咗向《芝加哥》(Chicago)、《Cabaret》等歌舞劇致意嘅場面。

6.圓動畫師夢
1991年《美女與野獸》動畫師Glenn Keane曾透露唔想野獸變成人，不過當時就一定唔批，佢曾經要求貝兒配音員錄製「Do you think you could grow a beard?（你可以留鬚嗎？）」，想讓貝兒同變回王子嘅野獸講呢句對白，不過始終都未能實現。最終可以於2017年真人版實現。