前曼聯中場恩斯認為，盛傳會喺今個夏天加盟曼聯嘅法國國腳中場保羅普巴，同紅魔鬼係完美嘅配合喎。咁講法，係咪即係曲線話前曼聯領隊費格遜當年畀呢位中場免費轉會祖雲達斯，其實係走漏眼呢？

恩斯係咁講嘅：「普巴會嚟到一個好難踢嘅聯賽，佢可以好好咁證明自己嘅實力，我認為佢同曼聯係perfect嘅配合。至於佢會同邊個拍檔，到底係卡域克、舒尼達連定係舒韋恩史迪加，我就梗係唔知啦。但係如果紅魔鬼真係簽到普巴，咁就向其他球隊發出警號，曼聯今年係嚟真嘅！」