已退休嘅恒生銀行（011）前一姐李慧敏（Rose）與丈夫兼金融界猛人袁天凡（Francis），經常恩愛出席公開場合，或拍住上做公益善事。唔講唔知，原來呢位電盈（008）前副主席係乒乓發燒友，佢仲做埋班主成立咗球隊，取名益聯投資（Latlink）。
啱啱喺上星期日（9月3號），隊波出戰香港乒總盃決賽，結果益聯喺港隊成員江天一領軍下，奪得亞軍佳績，僅以2:3賽果敗於海山投資。

Rose姐做啦啦隊

當日袁天凡仲同隊員齊齊領獎，笑容滿面，據聞佢喺初賽都有落場打；至於愛妻Rose姐，賽事期間就孖住Francis坐喺場內，做忠實啦啦隊搖旗吶喊。
乒總盃係乒總獎金最高、每年一度舉辦嘅賽事，前身叫香港盃，以團體賽形式舉行，今年共有99隊報名，經排名計分後，共有64隊進入賽事，益聯全場得第2名，成績都非常驕人，相信要多謝隊波嘅教練劉耀祖（前港隊成員）指導有方。
益聯約有10名隊員，除咗有港隊成員，亦有青少年成員，而且全部成員都係本地球員（除咗一位係專才輸入計劃），相信組班理念，與袁氏伉儷一貫培育年輕一代成才，回饋社會嘅公益哲學有關。
Rose姐仲係恒生舵手時，亦落力支持該行與乒總合作嘅恒生乒乓球學院活動，今年3月就喺博愛堂舉行2016畢業禮。

李華華
mailto:[email protected]