【新增影片】

經營ESPRIT的思捷環球（330）早前再公佈新的重組大計，公司今日舉行股東會。有小股東「做足功課」，準備好同業數據與ESPRIT比較，質疑管理層多年來無心戀戰，「迷惘咗8、9年」，並不看好是次重組計劃。

大會投票過後，場內約有50多名小股東拿過禮物，仍留守會場，質問管理層。

有小股東準備好快速時裝品牌Zara、H&M及本地服裝股佐丹奴（709）的業績與ESPRIT比較，他指，公司自2009年宣佈從華潤手中購入思捷中國已是不智的決定，此後業務一直走下坡，經歷供股等「乜嘢財技都出齊」，但仍然「迷惘咗8、9年，搵唔到出路」。

他又憶述，ESPRIT在興發街的黃金時代，當時只有佐丹奴和ESPRIT兩大休閒服裝界龍頭，但兩公司至今業績高下立見，「人哋佐丹奴最衰嘅時候有個幾（意指股價），之後升返上5個幾，今年就3個幾；我哋（ESPRIT)呢，唔好講百幾嗰啲，無謂講，而家淨返個幾！」

不過，該名股東對新任行政總裁Anders Kristiansen甚是欣賞，皆因Kristiansen在會上介紹自己正身穿ESPRIT的西裝褸，該股東手伸拇指說：「佢(CEO)好夠膽，我要畀個like佢！」，此時用手指向一眾管理層說：「有幾多個着緊你哋公司嘅衫？個個鍾意你份人工，但又唔鍾意你份工！」場內惹來一陣笑聲。

另一名小股東質疑公司不懂中國時裝市場情況。該名小股東說，ESPRIT以質料好見稱，「但佢哋（中國市場）唔係要呢啲呀！佢哋最好要爛得快啲嘅（質料），等佢哋可以換得多啲，價錢要啱佢哋。」

執行主席柯清輝隨即向股東們介紹坐在台下的中國設計師，他重申，公司重視亞洲市場，往後銷往亞洲或中國的產品中，將有30%在中國設計，公司亦有設計師長駐上海。

他坦言，公司曾掙扎過是否應走快速時裝之路，但認為轉型行不通，ESPRIT的忠實顧客喜愛品牌的質量，而且品牌多年來最成功的是批發業務，走向快速時裝與批發生意難以並存。

柯清輝在會後會見傳媒時重申，公司今後會聆聽顧客的需求，被問到多年來業績無起色有否想過賣盤，又有沒有人曾經接洽，他即擰頭說：「冇！如果唔係點會有新總裁又有新計劃啫？」

記者：邱曉欣

全球樓行 Dream House零距離
https://hk.feature.appledaily.com/overseasproperty