唔知係咪心理作用，喺上個月同無綫結束廿年賓主關係，離巢外闖嘅黃德斌，日前喺尖沙嘴接受訪問嘅時候，總係覺得o依家嘅黃德斌似乎多咗好多笑容，唔知係咪嗰啖自由空氣影響？佢笑笑口話：「唔關事，可能係以前有啲角色好鬱結，搞到個人都鬱晒，我最近嘅舞台劇係喜劇，多多少少都有啲影響啩！o依家係新開始，將來係未知之數，仲有好多嘢係需要去學習。」

講到離開嘅原因，德斌話：「其實都係自由度，有時公司安排你做嘅嘢，未必係自己想去做，但係你係公司嘅合約演員，安排得俾你嘅，當然要去做，如果再係咁落去，我又唔係好想，所以咪想試吓俾自己選擇，係時候有一個轉變，俾一個新衝擊自己，之後又會有一個新衝擊俾到觀眾。」

粗略估計，德斌喺呢廿年，拍過超過五十部劇集，之不過如果要數一部代表作，德斌話：「對自己嘅表現覺得係未有，不過好多套都入心入肺，好多角色都深入民心，去到好多地方，都有嗌到我又或者角色個名，好似《真情》到o依家都以為我係越南人，《金枝慾孽》、《火舞黃沙》、《珠光寶氣》、《天與地》，套套都有唔同嘅感覺，所以係咪主角對我嚟講，都已經唔係咁重要。」

不過始終個香港市場太細，有時候工作量又未必多，所以有唔少藝人北上發展，搞到無綫嘅小生花旦極度短缺，雖然有唔少新人輩出，但係始終冇啲前輩助陣，加上又邊學邊做，搞到俾觀眾話戲屎，近年同唔少新人合作過嘅德斌話：「與其話人新，不如話自己太舊，呢個係必然嘅事，你問我，邊個一出嚟就會係影帝影后？點都要俾啲機會佢哋，幫到咪盡量幫吓佢哋，只不過以前嘅好處係幕後嗰班人比較強啲，知道點樣去用人，好多時係為演員度身訂造，不過o依家情況啱啱相反，係演員去就角色，佢未揣摩到點做，又要試吓一個新挑戰。」

場地提供：The AIR (The ONE)

更多娛聞，喺晒《娛果》
http://fb.com/appledailyent