昨日法援局酒會，律政司司長梁愛詩一到就俾記者問六月之後會否留任，詩姐姐今次好爽快咁寸番記者：「你問都多餘！我有事宣布自然會搵你哋講。」唉，唔問吓又點知你老人家有冇嘢講？唔問嘢記者又憑乜嘢出份糧呢？
詩姐同之前批評政府太少諮詢業界的梁家傑同場出現，但唔知係咁啱定有心，兩人不但無共舞，連眼神接觸都無，詩姐姐就靜雞雞走人。梁家傑就任問唔嬲，重話只要湊夠一百個提名，佢一定推余若薇出去同阿董「練」過。不過阿董月尾個諮詢會，佢昨日才收到通知，佢同余若薇一樣，當日都要上終審法院辦案去唔到。
全場最風騷的竟是「黃公公」行政署署長黃灝玄，俾記者圍完又圍，話題「天馬」行空，皆因由添馬艦是否起新立會大樓，講到李國能法官最關心的終院「擠迫戶」，到被指議而不決，佢都一一解答，話好尊重記者天職問問題，佢嘅職責係答問題，重話可能到○七、○八年立法會先會搬，李官有排唔使諗搬竇。
（圖）黃公公噚晚鬼咁風騷，不厭其煩答記者提問，但答案永遠係「做緊」。


E-mail：[email protected]