港股噚日再升113點至16944，除咗滙控（005）及中海油（883）外，亦要多得新地（016），新地繼周三升逾4%後，噚日再升3.9%至88.65元。
雖然美息可能見頂，但現時樓市唔算好旺，加上港人投資選擇多，保值唔一定要買樓，地產股咁快開車，唔通預示樓價日後會起飛？有芬佬朋友話，近排市場游資充裕，加上大摩推波助瀾唱好新地見100元，仲話在未來12-15個月，股價在最壞情況下只會跌至74元，而在最理想情況下則可升至135元。
早前內地房地產股被大幅炒上時，新地由於在內地投資不多，股價相對落後於其他在內地投資比重較大的地產股。現時資金流入新地，除咗追落後，亦憧憬新地日後會積極投資內地房地產業務，其價值因而獲得重估。另外，新地亦可能分拆REITs上市。換言之，今次炒新地並非因為看好本港樓市，而是看好內地房地產市場的發展。
早前失意於意大利的和黃（013）亦是追落後之選，近日見有資金收集，但由於股價太大，一時間未夠動力大幅抽上，噚日升0.88%至74.45元。里昂睇和黃會見90元，都有兩成上升空間。