韓劇《OH！必勝奉順英》39歲女星秋瓷炫同大陸演員老公于曉光於去年1月結婚，今個月1號秋瓷炫誕下囝囝，不過產後當晚佢就出現癲癇症狀，被送到急症室救治，雖然曾一度留院ICU，但本月12號佢已出院，亦喺坐月中心照顧BB及休養，之後仍需復診。

而噚日播出嘅TV朝鮮《星星Talk Show》節目中就談及秋瓷炫，當中節目內嘅一名記者就指秋瓷炫產後所入住嘅坐月中心屬於頂級，內裡設計十分豪華，設備亦十分完善，除咗秋瓷炫外，其他曾生B嘅女星如李敏貞、韓佳人及高素榮等都曾入住呢間坐月中心。而據節目指，坐月中心最低消費為650萬韓圜(約4.6萬港元)，最貴VIP更達2,200萬韓圜(約15.5萬港元)，而VIP房仲會有一對一嘅呼吸設備，極盡豪華。

更多韓流，喺晒《娛果》
http://fb.com/appledailyent