環球經濟麻麻但各國奮勇放水下,股市繼續亢奮,香港家陣通街股神唔在講。歐美股亦唔輸蝕,連守齋15年嘅納指上周亦終於再創收市新高,只要升多三十零點,intraday高位亦要破。傳統智慧話股市預視經濟,斷估今次難靈驗,但執輸行頭慘個敗家,大家心態上都炒咗先算。
聯儲局本周又議息,事先張揚下大家預咗息口唔變,6月定9月開始加息,先至係焦點所在。美國近排數據無之前咁靚,繼上月新增職位大減後,核心耐用品定單錄得逾兩年最大跌幅,加上強美元對企業盈利的影響浮現,大家都好關注,今次會後聲明會否就幾時加息作出較明確提示。有儲局傳聲筒之稱的《華爾街日報》記者Jon Hilsenrath上周話,儲局官員關注強美元對當地經濟的影響,加上本周出爐的首季GDP應麻麻,儲局班高官近排口風淡番,估計6月加息呼聲應該唔高。