成龍早前推出嘅自傳，引發連串風波，其中一個，係有報道話鄧麗君嘅家人要求成龍唔好再「消費」小鄧，成龍聞言即謂:「邊個講？邊個屋企人？連(鄧麗君)三哥都話冇呢回事。你哋話有人講，邊個講，要攞出證據嚟。」

本書仲講到成龍爆料，話有女星好大牌，令人猜想矛頭是否直指袁詠儀，成龍即解話:「我見過好多(大牌藝人)，但我冇講名，我冇講過係袁詠儀，傷害人嘅嘢我係唔會講嘅，不過邊個做過自己心知肚明。」

拿，根據成龍嘅自傳憶述，呢位女星曾同成龍合作，部戲拍完之後，佢哋要求該女星補配幾句對白，遭拒絕，成龍一怒之下，向香港導演協會投訴，點知多位導演都有同感，認為呢位女星唔敬業，集體將之封殺，之後該女星就轉咗去拍劇。咁啱，兩屆金像獎封后嘅袁詠儀，本來聲勢如日中天，但突然喺影圈冇咗影。袁詠儀自己都講過，話曾經因為脾氣大，得罪人，亦試過因為喺片場瞓著被嘈醒而同導演王晶對罵。咁究竟，成龍講緊嘅女星，是否就是曾合拍《霹靂火》嘅袁詠儀呢？唔知喇。

好喇，跟住記者就問成龍關於吳綺莉女兒卓林回家一事…之前喺北京兩會上發晒火，指斥謂因為有記者在場令佢唔敢講真話嘅成龍(新聞連結: http://bit.ly/18dQ0v9 )，又「發作」，不過佢只係拍一拍枱，企起身，但笑住嘅，講咗句:「多謝！」就走人喇。

相關新聞：
寸爆袁詠儀指住王晶狂鬧
http://bit.ly/1G3LUoy